Nel día d’ayeri, cautivu y desarmáu l’exércitu de lo razonable, les tropes del partíu socialista algamaron los puestos preferentes a la cabeza de les manifestaciones sindicales, a les que vuelven, yá na oposición, depués de llargos años de gobiernu ensin que segundu y tercer axetivu del nome oficial del partíu apaecieran mayormente per parte dala.
Empieza la guerra. Vuelve lo alternativo. Los popes de la llucha escontra la derecha, los Jimmy Hendrix de la socialdemocracia, les Janis Joplin del centrismu reformista, tornarán a atravesar les cais de la mano de los operarios a los que nun-yos temblaría la mano al volver a vender otra vuelta, nun llargu camín de cuatro años hasta volver a tener la imaxe de partíu d’izquierdes de cara a un nuevu espectáculu electoral.
Ye hora de rockanroll. Melenes, guitarra eléctrica, porrinos nel camerín de Rubalcaba. Manes alzaes en forma de cuernu, mecheros encesos. Otres tres. Furgón y carretera. Ser el pueblu. Tontos y tebios qu’engañar. Toques glam. Un poco d’anticapitalismu de salón.
Saludamos al apocalipsis diariamente, ardemos con Grecia cuando pinta, vemos cayer cada día delantre nós cachiquinos del mundu que conocíemos, mientres les rutines de la comedia bipartadista continúen impasibles cumpliendo’l guión escritu va yá más de trenta años.
¿Daquién ye tan fatu como pa ver cuatro veces la mesma telenovela turca, una y buenes conoz el desenllaz? ¿Que pasaría si la chiquitomanía, en cuenta de ser una moda efímera, durare hasta l’actualidá y hasta l’infinitu?
¡Dios de los ateos! ¡Dame una piedra, y dientes duros pa morder la piedra que me deas, y xuro que voi alimentame d’ella pelos sieglos, morder la piedra hasta sangrar, abrazala dulce peles nueches, al dormir, si puedo, n’honor d’esta puta época de piedres qu’habiten l’interior de cráneos! ¡Xuro solemne mirar al frente, prender el mecheru y cantar estribillos en consecuencia!
BSO: La cresta nueva de Rubalcaba
