Author Archives:

Localidades Agotadas

Posted by pxsuarez on

Yá ta en marcha la segunda edición del festival Localidades Agotadas, qu’entamaron l’añu pasáu Lata de Zinc y la plataforma SOS cultura. L’eventu vien a siguir la mesma dinámica que l’anterior certame de Cabaret, qu’organizaba tamién lata de Zinc: actuaciones pel circuitu de bares collaboradores -que se peten-, y una esplícita vocación multidisciplinar. Foi nesi contestu onde probé va tres años a facer Technopoética, un poco a la brava. Esti añu, como pieslle del festival, pal domingu 13, volvemos a repetir timba con Colmena. Nel programa, por problemes de falta de coordinación, anuncien finalmente a David Acera y al compi Sergio S. Taboada, que por motivos llaborales nun va poder tar. Pela cueta, van tar Suarón y Miguel Allende, que repiten, y Laura Marcos. Cuento que tendré que facer otru cartelín y anunciar el eventu completu. Pero eso, pa la selmana que vien. De momentu, pongo’l xeneral del festi. Y equí, el programa.

.

Con Pidal Montes en la Caja

Posted by pxsuarez on

Tengo la idea de nun prodigame demasiao n’Uviéu, por aquello de nun ser pesáu. Sicasí, a fin de cuentes tampoco cuesta munchu enredame, y más a la de facer coses nuna segunda casa como ye la Caja. D’esta acompaño al poeta de Carbayín J.I Pidal Montes, xunto al gran David Suárez, Suarón.

Ganemos en Galicia

Posted by pxsuarez on

Nos años del felipismu y la quinta’l buitre nos que nos criemos, la política venía a figurásenos poco menos que como la lliga del fútbol de la que víemos los domingos de nueche n’Estudio Estadio’l resume. Ye por ello que, nel estáu de coses de los años ochenta, por una simple regla de trés, conforme a los tiempos que corríen, yera bien corriente que los neños, erróneamente, asimilaremos el Barça al Pp y el Real Madrid al Psoe.

Tocante a esto, alcuérdome perfectamente del mio collaciu Josín ximelgando’l puñu n’altu nel vestuariu de ximnasia y glayando al que lu quisiera oyer aquello de ¡Ganemos en Galicia!, que venía a ser un anticipu de los tiempos de dream team y aznarismu que diben a venir depués.

Entós, Fraga Iribarne acababa d’arrasar nes elecciones autonómiques per primer vez, y el mio collaciu Josín, que tenía un gran amor polos eternos aspirantes, compensaba cola victoria autonómica los fracasos lligueros de los culés.

Con too, yá’l mundu del espectáculu se nos ofrecía na forma básica de la dicotomía, y nesti estáu primariu de coses foi afondándose terriblemente hasta l’actualidá. Tamién Barça y Madrid yeren y son la mesma mierda, ocupen la inmensa mayoría del espaciu mediáticu y pervierten a traviés d’él la materia gris de la tan mentada ciudadanía dende la cuna.

Na trastienda de los dos grandes, al empar, foron medrando los equipos de la costa este, engordaos a base de dineru negro proveniente de la especulación inmobiliaria, que vienen a ser un poco como’l parafascismu de la Upyd, ufiertada como alternativa posible al establishment circense instituyíu cola restauración borbónica.

Nel intervalu, el vieyu fútbol norteñu, herederu directu de los oríxenes ingleses del deporte y fíu de la clase obrera industrial, foi cayendo nuna decadencia lenta y progresiva dende los tiempos yá llonxanos nos que los equipos vascos s’impusieren en cuatro lligues consecutives, na llende ente los setenta y los ochenta del sieglu pasáu. Decadencia que ye probablemente la mesma que la de la fuerza de la clase obrera industrial na que surdieron.

Esto lleva a pensar que quiciás el fútbol nun ye tán intrascendente como se piensa, o quiciás tolo contrario, que la política espectacular que contemplamos a diario yelo tanto como los  proverbiales ventidós puntos en pantalón curtiu corriendo fatamente detrás d’un balón. O cómo la realidá se nos antroxa de teatru, y viceversa. En tou casu, los paralelismos son evidentes y  Josín, por desgracia, bien mirao, yera más visionariu qu’otra cosa.

El Macondo de Jack le Punk

Posted by pxsuarez on

Dellos años depués, delantre del pelotón de fusilamientu, Jack le Punk alcuérdase del día en que la güela faló per primer vez, na comida familiar del domingu —a la qu’acudía, como nun podía ser d’otra miente, resacosu— de los neumáticos de la F1.

Gangartá yera entós, tovía, una aldea de 20 cases de bloque y uralita construyíes na oriella d’un regueru nel que desagüaba l’orín de toles cuadres del llugar. L’alonsismu yera tan nuevu que munches marques de les que salíen nel cascu de la estrella nun teníen nome, y pa mentales había que describir el logotipu con un circunloquiu.

Sicasí, la güela de Jack le Punk, Telecinco o quien fuere mediante, tenía un conocimientu medianu de los problemes qu’afectaben a la mayoría de les ruedes de la competición.

Diría más. La güela de Jack le Punk ye’l pueblu. O meyor, la multitú. Los pocos neños qu’había en Gangartá nos ochenta llantaron una canasta al llau d’una de les parés de bloque y emularon años enteros a los subcampeones de la Olimpiada de Los Ánxeles. Mientres, por cierto, Fernando Martín, una de les estrelles d’aquel equipu, tenía’l gustu pésimu de metese na cama con esi felpeyu de la Obregón.

Yá nos noventa, pasada la fiebre de cobis, curros y dinosauros, probablemente nun quedaben neños abondo en Gangartá como pa Continue reading →

Dos poemes de la Cuenca

Posted by pxsuarez on

Mañana, xueves 15, van pasar pel CSOA La Madreña dos poetes de La Cuenca, que dacuando escriben poemes cola Cuenca como fondu, como estos dos que siguen. El primer de los que pongo pasómelu l’autor va un tiempu pa correxir la versión, y permanez inéditu n’asturianu. El segundu pertenez al poemariu acabante de salir  Despidida.

 

PRINCESA EQUIVOCADA, de J.I Pidal Montes

Siendo neños,
en Carbayín,
ficimos un castiellu nel aire.

Ciertu día,
una princesa okupa
-de sópitu-
metiósenos nel castiellu
acomodándose na habitación
más afayadiza.

Y al día de güei,
ellí sigue la princesa:
sola,
murnia,
atrapada nel aire.

 

FREDDY, de Pablo Antón Marín Estrada

Alcuérdome de Freddy
una mañana de seronda
na parada’l Carbonero
de Sama, la bolsa de viaxe
al llombu, entós, Freddy
pa ónde vas, voi pa Canadá.

Adiós, Freddy, hasta más ver.
El mundu ye redondu,
per cualaquier camín marches
habrás volver y volver marchar
pa volver y volver marchar
per cualaquier camín marches
habrás sentir los rebusquinos
del cielu grande y el sol altu,
los rebusquinos del aire
na cara, nos güeyos, nel pechu
que s’encende de zozobra
al que marcha y nada va estrañar.

Equí naide me quier, dicía Freddy,
naide en Sama nin na Felguera,
en Ciañu, Barros, Lada, en tol vai,
me puede ver, tarrécenme hasta
los nenos y les vieyes, nací equí
pero nun soi d’equí, dicía Freddy,
marcho, voi pa Canadá.

Alló la tierra ye meyor, nun pregunta
de ónde vienes, qué faes equí
pero nun soi d’equí, dicía Freddy,
marcho, voi pa Canadá.

Alló la tierra ye meyor, nun pregunta
de ónde vienes, qué faes equí,
qué quies, nun te diz fuera d’equí,
tu nun yes cómo nos, naide tarrez de ti
porque naide nun te conoz y los díes ellí
son llargos y gustosos como la dixestión d’un osu,
llargos y gustosos como l’osu de l’alegría.

Adiós, Freddy, hasta más ver.
El mundu ye redondu, etc.