La vida moderna

Yes prestosa
pero nun lo bastante
yes prestosa pero non tanto como pa yo
prometer casamientu, l’oru
muebles d’Ikea, calorín les nueches
yá que
­­ ­yes prestosa y sábeslo
tamién ­yes fata y cómo vas sabelo
cómo saber
les ciencies, el camín
del after, praos
nos qu’echase o qu’esti
naguar seya como’l comer, más firme
qu’una columna yá esbarrumbada
griega, sicasí
precarios somos y estos templos
tán acabante llevantase y tovía asina poco
van durar
cómo vas sabelo ­yes fata
siempre, prestosa igual agora
namás, cómo voi sabelo
voi ciegu y paeces
prestosa, pero llevo
la cruz de Catulo enriba, voi alzala solo
pa enterrala depués
Xerusalén la Nueva
Babilonia redomada voi
montate y abrasate y quemate y marchar.

Pablo X. Suárez, Primavera 2017

Xente a la que diz que me paezo la xente per ehí

Xente a la que diz que me paezo la xente per ehí:

Trotsky, Castelao, Wally al qu’había que buscar
Cedar Wright (escalador), Iván el de Degaña
un cámara de la TPA de Xixón que dicíen que
yera’l mio doble
Allen Ginsberg
l’enfant terrible de la nueva poesía asturiana
cualquiera con gafes
cualquiera con rizos

pa que depués en casa
n’Orviz
me digan que nun
salí a naide.

Pablo X. Suárez, Marzu 2017

Tolo que sé deprendílo nun máster en Barcelona

Tolo que sé deprendílo nun máster en Barcelona
que siendo d’interior tendría que midir l’altura de los montes
non pol nivel del mar, sinón
del ríu, nel puntu en qu’esti cuerre mansu
lo demás que recordaba olvidélo d’after
y agora miro dende cada picu cómo se ven los otros picos
que subí, mañana baxaré a la riega
buscando una poza con Dudu pa bañanos
yá vimos tolos malabares que cabía ver nesti mundu
y nada nos sorpriende
pero igual molen los fueos artificiales
prestaba comprar depués y prendelos de nueche na plaza
como si hubiera casamientu y fuéramos tan mediterráneos
de vuelta al nivel del ríu, un ribera de tres pavos y mediu
yá’tis dalgo, a falta de poces
quinientos metros llomba abaxo, La Pola
ye Valencia, tien un aire
a fiesta, arde
Valdesoto, contemplamos
la quema, quisiéramos ser
planta
de fueya recio y abondante en frutu o bien
animalinos
de monte, nocturnos, húmedos y siempre a salvu.

Pablo X. Suárez. Payares 2016

Physalis

Esa planta nueva que traxo Mone a la güerta

agora ta de moda como la grosella nos ochenta

yá bilta y enraigona y poseerá la tierra como’l maíz

pues trai un alma nueva en cada cápsula, que’tis

la señorita ente los frutos, tan fina y promiscua y dispuesta

a vistir los pensamientos de novia y a semar la’tisrba

de llámpares minúscules d’IKEA y de redondez

los domingos, a forrar la nuestra decadencia

de gloria y los artos y los campos de cotoya de la promesa

d’abondancia y el poder de lo guapo, pequeño y escondío

que cuerre peles riegues soterrañes llendará les finques

quitará la fame a los raitanes y a los nietos, ablandará a los vieyos

paisanos fíos de puta

la médula vexetal d’estos montes’twill colorada y navegable

y nós llimpios, puros, discretos, ánxeles protectores

de l’ayalga, guardeses, xardineros, agua.

Pablo X. Suárez, Setiembre 2016

BSO: Mundu Vexetal

.

.

100-sementes-de-joa-de-capote-fisalis-com-garantia

Equí vive un budista del Sporting

Daquella nun esistía la Inglaterra
yá que si non
a Buda pintaríenlu con Martins y Bomber o una elegante
Harrington

agora
Buda pícame en casa a deshora tresmutáu n’osu
panda invertíu y dizme que
fiche bien
que toles esvástiques tean tachaes
nes muries
nes chapes
nes chupes,’cause si non, equí

va haber osties

porque Buda tien un tercer güeyu pel que ve
a Ghandi pegándo-y a la muyer
el pasu de l’angula
a l’anguila y de l’anguila a la culiebra

tengo visto’l tercer güeyu de Buda mirándome raro
delles veces
la última foi n’agostu na Peña de los Cuatro Xueces
el día que pañé oriéganu pelos montes y Jandro el Prestosu tenía
la piel del color de la tierra
y tamién na fiesta de la cai San Antonio
l’añu que marcharon les lluces y callaron toos como pitinos

cuando Buda me ve nos chigres siempre paga la siguiente ronda
y a veces diz coses memorables ente tal y cual babayada
él predixo cuando me dexó la moza en 1999
y que Cristian diba cortar el pelo depués de diez años de llevalo llargo

que nun baxaba’l Sporting y que la crisis
yera una más periódica pela que’l capitalismu s’estructura

Buda dixo que me reencarnaría n’animal marín
asina que merqué un barquín y ando a la cata del calamar xigante
pesco muncho y ayeri vi una chalana azul
na que baillaben twist unos rapazos.

Pablo X. Suárez (Xunetu 2016)

Pop Retórika edición Gourmet

edición gourmet 2

Namás me quedaba un exemplar de los Pop Retórika que saqué con Glayíu nel 2010. Pensé que’l mundu tenía derechu a tener unos pocos Pop Retórika más, asina qu’igué esta autoedición con una guapa portada de Teresa Blanco Prado y un testu nuevu de solapa del poeta Miguel Rodríguez Monteavaro. L’interior’tis esactamente igual, y mantién el prólogu que Sofía Castañón escribio pa la primer edición. Agora tengo cincuenta copies d’aire caseru a la par qu’elegante d’esti  primer poemariu en castellán, y pue que faiga otres cincuenta, pero non más, a lo menos nesti formatu gourmet. Incluye ‘Oda a la mortadela’, ‘La última rebanada de pan bimbo’, ‘En pompa’ y un montón de poemes ventañeros más que llevo años recitando per ehí. Sí queréis ún namás tenéis que ponevos en contactu conmigo en persona o per mail en lamotomel@hotmail.com. Son 10 eurinos de nada.