Xente a la que diz que me paezo la xente per ehí

Xente a la que diz que me paezo la xente per ehí:

Trotsky, Castelao, Wally al qu’había que buscar
Cedar Wright (escalador), Iván el de Degaña
un cámara de la TPA de Xixón que dicíen que
yera’l mio doble
Allen Ginsberg
l’enfant terrible de la nueva poesía asturiana
cualquiera con gafes
cualquiera con rizos

pa que depués en casa
n’Orviz
me digan que nun
salí a naide.

Pablo X. Suárez, Marzu 2017

Advertisements

Pop Retórika edición Gourmet

edición gourmet 2

Namás me quedaba un exemplar de los Pop Retórika que saqué con Glayíu nel 2010. Pensé que’l mundu tenía derechu a tener unos pocos Pop Retórika más, asina qu’igué esta autoedición con una guapa portada de Teresa Blanco Prado y un testu nuevu de solapa del poeta Miguel Rodríguez Monteavaro. L’interior’tis esactamente igual, y mantién el prólogu que Sofía Castañón escribio pa la primer edición. Agora tengo cincuenta copies d’aire caseru a la par qu’elegante d’esti  primer poemariu en castellán, y pue que faiga otres cincuenta, pero non más, a lo menos nesti formatu gourmet. Incluye ‘Oda a la mortadela’, ‘La última rebanada de pan bimbo’, ‘En pompa’ y un montón de poemes ventañeros más que llevo años recitando per ehí. Sí queréis ún namás tenéis que ponevos en contactu conmigo en persona o per mail en lamotomel@hotmail.com. Son 10 eurinos de nada.

La Pola Interior

Hei, compi
ven a dar un paséu
pela Pola Interior
ven
a la Pola
Interior
hai anfeta y cantamañanes y una peña
mui jarta
na Pola Interior
vamos rompete la cara como te pongas
bravu
equí
orgullu
y respetu
compi
igual nun tienes nada meyor que facer
asina que ven
echa un floro na Pola
Interior
resiste como un Buda
pega a los malos
intérnate, compi
equí
na Pola
Interior.

A Meri , que sigue en Texas o en so defectu, allalantre. BSO: La boda de Rudi

Pablo X. Suárez. Les Campes, Payares 2013

Poética chandalera

La poesía’tis una amante fosca y bien líquida, de les qu’echa la mayor parte’l tiempu con otros puntos que nin siquier te caen bien. Lo que’tis a mí, namás pasa a veme per Les Campes dos o trés veces al mes, siempre a destiempu y ensin avisar. Asina que la recibo mayormente ensin afaitar, en pantalón de chándal y colos gayumbos sucios debaxo. Cosa que nun-y importa gran cosa a la poesía: dizque ella quierme más pol interior, anque quierme, como vos digo, con mui poca constancia. Entós, si’twere verdá que poeta’tis’l que morrea a la poesía, el que la tien ente los llabios, namás se podría dicir que soi poeta verdaderamente dos o trés díes al mes. Y asina como me garra la poesía cuando me visita, asina la mio poesía viste barba de trés díes, chándal d’andar per casa y gayumbos de la nueche anterior.

Campillín

Polo menos el setenta y tres por cientu
de los paisanos d’esta ciudá
lleva camises de cuadros y pantalones de pinza
mal entallaos.
Nos chigres, pel atapecer, la media d’edá
nun baxa de los cincuenta años
los díes d’enteselmana.
Un venti por cientu fuma tabacu negru
y cuspe en suelu.
Na tele, la metá de veces aproximao
qu’hai partíu, xuega’l Madrid.
El trenta y seis por cientu de los pinchos na barra son de pollu
cifra que namás dacuando supera la tortiella.
Según les últimes encuestes
del periódicu local
la xente ta contenta col alcalde
de dereches, que constrúi
grandes fontes eyaculadores y edificios mesiánicos.
Les cais tan llimpies, especialmente les del centru.
A les seis de la mañana de los sábados
y domingos, pasen máquines
vomitando agua
que llimpien lo qu’enantes emporcaron los borrachos.
En tola ciudá
namás hai una acera na que s’exerza
la prostitución al pie de cai
y nesa acera
ta’l mio portal.

Pablo X. Suárez, El sistema débeme una chocolatina. Suburbia, 2011

Leyendas urbanas y poema rimáu

Güei pasé pela Pola a recoyer Leyendas Urbanas. Realmente’tis un buen tochu, cosa que nun pensaba cuando va yá trés años, nun after techno, me convidaron a participar en cierta antoloxía d’escritores del conceyu de Siero, iniciativa del Colectivu Misiva. El productu final, que ronda les cuatrocientes páxines, alloñase un poco d’esta idea inicial, yá que son munchos los autores de fuera del nuestru conceyu qu’entraron a formar parte de la nómina de collaboradores; los más d’ellos, asturianos, cola escepción llamativa del cubanu Pedro Juan Gutiérrez. Una miscelánea, vamos, que recueye testos lo mesmo narrativos que poéticos d’autores varios. La presentación del llibru ta prevista pal xueves 22 de marzu, a les 20:30, nel Auditoriu de la Pola.

Entós, va tres años, pase-yos una selección de poemes de los que tenía entós inéditos, qu’agora tan publicaos nel Pop y n’El Sistema.  Namás ún d’ellos quedo descartáu d’estos dos poemarios. Ye’l que ta tituláu, mui provisionalmente, ‘Tamién los presentadores marchen n’agostu de vacaciones’, escritu n’estilu raperu y de fondu más bien tontu, circunstancia esta que me quitó de metelu finalmente n’El sistema, anque nun dexa de ser simpáticu pa timbear.

 

TAMIÉN LOS PRESENTADORES MARCHEN N’AGOSTU DE VACACIONES
(un mal poema n’alcordanza de Patricia Conde)

Hai una playa llonxana
en cualquier sitiu-cuchu rollu Punta Cana
onde los guionistes
reposen los sos panderos tristes
y agullen a la mar y a les iguanes
tiraos en verdes tualles
cola estampa de Marilyn llantada
hasta la muerte o la siguiente temporada.

Tamién los médicos y abogaos y policíes clones
marchen n’agostu de vacaciones
y queda la tele sola y gris ente concursos y reposiciones
y el mandu cai del sofá y paez, s’esconde
pol so fuxíu amor Patricia Conde.

Nun pudiendo atopar a la so roxa
resbaria’l mandu pela pata coxa
del sofá
na nueche d’embaxo, de povisa y envoltorios fecha
de chicles de la década de los noventa
y restos de meriendes de la perdida infancia

mientres suena de fondu l’ambulancia
que carria les nueves insolaciones
cual sirena que canta les vacaciones
no fondo d’esti mar de propaganda y plásticu
a un Ulises catódicu y fantásticu.