Como estación, tengo claro que’l branu acabante d’entrar fomenta más que nengún otru tiempu l’añu la babayada y el payasismu xenerales. Y nun lo digo namás pola circunstancia, habitual na bohemia contemporánea, de qu’al salir del furacu nel que’l tarambaina escosa’l fondu de la nueche les guapes rayaes de sol de xunetu saluden a esti con un fuelgu nuevu que convida inevitablemente a vermú y terraza, dobleterismu patán, públicu escarniu y espectáculu gratuitu p’asustaos compradores matutinos del pan y del periódicu domingueru, petáu de fascículos.
Vencida Marbella, la capital nueva de la caspa más cool ye Ibiza, onde’l doblete pastilleru ye institución, según cuento. No musical, el fechu de que los meyores diyeis alemanes de house y minimal visiten cada añu la fedionda isla pa tremar con fiestones bárbaros les putes macrosales quiciás nun tenga nada que ver, pero desde llueu seguro que forma parte del mesmu movimientu históricu que llevó, nos últimos tiempos, a la desapaición d’un fenómenu tan carismáticu como yera’l cantar del branu.
Nesta cultura líquida, va bastante que nengún cantar d’impón mayormente a los demás na patética batalla entamada cada primavera por salir de la parva cuchu de la inmundicia musical eroticofestiva pa tolos públicos. Namás Mayonesa y Gasolina s’averaron mínimamente na última década a lo que foi un xéneru resplandeciente ente los años 60 y 80 del pasáu sieglu.
Ello ye que nos branos de la infancia había solo un cantar, que se repetía como un mantra nos chiringuitos, romeríes y programes cachondos lazarovnianos. Un cantar horrible que llevabes puestu mientres esperabes na feria na fila interminable pola gorra de la caxa que regalaben, que sonaba en coche d’al llau a la salida de Rodiles, nel atascu eternu de los domingos a la vuelta, y que dicía coses tan sesudes como el tiburón se la llevó o que no me digan en la esquina el venao, el venao, que eso a mi me mortifica.
Col tiempu, creo que nos convertimos nun pueblu muncho más cultu y preparáu, y que la nuestra preparación nos torga pa permitir qu’un únicu cantar domine per tres meses les nuestres vides. Cada añu, hai polo menos diez temes, a cual más fatu, que, al mesmu nivel, compiten por estropianos l’atmósfera acústica de feria, plaza y romería. Miro’l videoclip nuevu de Leticia Sabater, que tien una guapa estética porno-VHS: ye una versión cutre de Se fue, aquella babosada noventera de Laura Pausini. Pela ventana, entren guapísimes rayaes del sol. Ello ye la esperanza, l’anunciu d’otros tres meses d’amor enlatáu, revolución a tiempu parcial y música soleyera. Pues nada, guai.
BSO: Retropornografía